शिकायत जिन्दगीको

    ****************
फगत आँशु थोपाभित्र चुर्लुम्म जिन्दगी भो
रगत सुकी टाटाबीच अलमल्ल जिन्दगी भो 
आँशु छ्याप्ने मुहान सबै सुकाएर हाँस्न पाए 
निर्लज्ज यी रक्तटाटा लुकाएर मास्न पाए 
नहुन्थ्यो कुनै शिकायत जिन्दगीको 
रहन्थ्यो सुनै नियत जिन्दगीको

मात्र दुख्ख भवसागरको अपार जिन्दगी भो 
पात्र पीडा मन्चनघरको हतार जिन्दगी भो 
दुख्ख तार्ने नाउ खियाई सुखद्वीपमा बाँच्न पाए 
जिन्दगीलाई मद पिलाई नेपथ्यमै नाच्न पाए
नहुन्थ्यो कुनै शिकायत जिन्दगीको
रहन्थ्यो सुनै नियत जिन्दगीको

केवल कष्ट खाँदिएको धोक्रो जिन्दगी भो
देवल जस्तै धमिराको खोक्रो जिन्दगी भो
नष्ट गरी कष्ट सबै हर्षश्वास फेर्न पाए
उमङ्ग भर्दै हांसीखुशीको उत्कर्षवास हेर्न पाए
नहुन्थ्यो कुनै शिकायत जिन्दगीको
रहन्थ्यो सुनै नियत जिन्दगीको
   ****************